التحضير لعملية تكميم المعدة
بعدها طلبت لستة تحاليل دم صورة دم كاملة وتحليل وظائف كلي وكبد وسرعة نزف وتجلط وحتي فيروسات الدم عملتها
وكمان تحاليل الغدة الدرقية T3, T4, Tsh
بعدها بعت ليها نتيجه التحاليل والحمد لله طلعت تمام وكويسة طيب ها جاهزة تعملي العمليه الاسبوع ده
هنا قولت زي محمد هنيدي (هيا مالها بردت كده ليه)
مكنتش جاهزة لا نفسيا ولا ماديا بس سبحان الله فلحظه لقيت نفسي بكلم اخواتي ولقيتهم بيجمعوا ليا مبلغ العملية
مكنتش مصدقة بس هيا تدابير ربنا ومشيئته
المهم مطولش عليكم قولوا لاء طولي 😁 كلمت الدكتورة المساعدة انا جاهزة قالتلي لاء الدكتور يشوفك الأول تعالي الاسبوع اللي جاي قابليه
قابلته يوم الأحد وشرح ليا العمليه ونسبه نجاحها والنظام الغذائي اللي همشي عليه بعدها
وانا في العيادة قابلت ناس عملت العملية كنت خايفه و متوترة قعدوا يقولولي متخافيش العملية سهلة الصعب بعد العملية علشان مش هتعرف تاكلي
واحدة قالتلي بالنص كده روحي كلي كل اللي في نفسك علشان هتتحرمي منه مش هتعرف تاكلي زي الاول بعد العمليه
روحت البيت حكيت لوالدتي كل اللي قاله الدكتور وماما كانت مش خايفة لا دي كانت مرعوبة عليا من العملية (ملحوظة ماما هيا سبب تأخيري عن عمل العملية سنين)
المهم خلاص بقي بدأت احضر نفسي واقرأ كتيب بعته الدكتور ليا عن العمليه والنظام الغذائي بعدها
مكتفتش لكده لاء انا بحثت ودخلت جروبات كتير علي الفيس وقنوات تليجرام ويوتيوب واسمع واشوف خبرات الناس
الجزء اللي جاي هاشرح فيه يوم العملية قبل وبعد
تعليقات
إرسال تعليق