يوم العملية
يوم العملية كنت متوترة جدا منمتش اليوم اللي قبلها
ملحوظة (قبل العملية بيومين كنت بشرب سوايل بس ماية وعصير وشوربة لحم او دجاج)
طبعا كنت صايمة من قبلها بليل يعني من منتصف ليله قبل العملية
جهزت لبس ليا علشان قالولي اني هبات يوم العمليه واروح تاني يوم الصبح
خرجت بدري الصبح حوالي سبعه ونصف صباحا من البيت وصلت المستشفي حوالي تمانية ونصف دخلت الريسبشن وصلوني للغرفة اللي هقعد فيها
جت الممرضه معاها حاون علشان اجهز للعملية هنا خلاص ركبي كانت بتخبط في بعض
غيرت لبسي وطبعا راسي والف سيف اني ادخل العمليات بلبسي تحت الجاون تيشرت وبنطلون كان اهم حاجه عندي اهم من العملية نفسها (اللهم استني فوق الأرض وتحت الأرض ويوم العرض عليك يارب)
لبست غطاء للراس (تحت الطرحة) وغطاء القدمين
بعدين قاسوا ضغطي والحرارة والنبض قبل العملية
اخذوني علي العمليات وانا ساعتها كنت برتعش حرفيا
دخلت العمليات لقيت قدامي ترابيزة العمليات زي الصورة اللي فوق وكله حواليا عمالين يجهزوا و بيقولولي اطلعي علي الترابيزة ونامي
ياربي احساس صعب اوي كنت مرعوبة طلعت علي الترابيزة ودكتورة التخدير جت بدأت تكلمني وتركب كانيولا في أيدي
وانا كنت محضرة نفسي اني هاقول قرآن في سري مش هاعد لعشرة
لقيتها بتقولي خدي نفس وكمان نفس وروحت في النوم
صحيت علي اخواتي بيقولو ا ليا عاملة ايه انتي كويسة
ايه ده العملية خلصت وانا خرجت الحمد لله أحمدك يارب
العملية اخدت حوالي ساعة وربع من اول ما دخلت لغاية لما خرجت
كان متركب ليا جهاز PCA ده جهاز منع الألم عبارة عن مسكنات قوية بتتاخد في الوريد بجهاز بينزل نقطه نقطة مظبوطه بجرعة معينة
الحمد لله مكنش فيه ألم يذكر بدأت احرك رجلي في السرير عدي عليا اربع ساعات قومت من السرير وبدات امشي في الغرفة رايحة جاية
غيرت ملابسي وفضلت امشي كل ساعة عشر دقايق
كنت عطشانة مش جعانة خالص
مشربتش ماية الا الساعة تسعة ونصف مساءا
كان عدي بالظبط عشر ساعات علي العملية بلاش حد يشرب قبل كده علشان ميحصلش قيء
الحمد لله عدت اول ليلة علي خير
الصبح بقي الدكتورة المساعدة جت علشان تكتب ليا خروج
بس الاول تشيل الدرنقة (أنبوبة في الجنب ناحية المعدة متصلة بكيس علشان يجمع الدم الموجود جوه تجويف البطن)
الحمد لله شيلتها وغطيت مكانها بغيار للجروح
وقالتلي اغير علي الجروح (اربع فتحات المنظار وفتحة الدرنقة كل واحدة فيهم حوالي سم واللي فوق السرة 2سم علشان بيخرجوا منها الجزء اللي استأصلوه من المعدة)
اخدت روشتة العلاج كان فيها مضاد حيوي شراب وأدوية سيولة ودواء الحموضة وباندول
وكان لسه معايا جهاز مانع الألم بيتعلق في الرقبة
تعليقات
إرسال تعليق